అమెరికా నుంచి ఉత్తరం

అమెరికా ప్రజలు తమ జీవితాలలో మార్పు రావాలనుకుంటున్నారు. ఉద్యోగ అభద్రత, నిరుద్యోగం ఇంకా మొన్నటి దాకా గట్టుమీదున్న గాస్ (పెట్రోల్) ధరల సమస్యలతో, ఇక్కడి వారు విసిగి వేసారుతున్నారు. గాలన్ (1 US gallon = 3.78 liters) గాస్ నాలుగు డాలర్లు మించితే,కారు వాడకం తగ్గించారు. హైబ్రిడ్ కార్ల గురించిన అవగాహన పెంచుకుంటున్నారిక్కడ. బుష్ ప్రభుత్వ విధానాలే తమ దేశ ఆర్థిక స్థితిని ఇలా నెట్టివేసిందని, ఒబామా వస్తే పూర్వ వైభవం పునరావృతం కాగలదని పెద్ద ఆశలో ఉన్నారు. చాలా చోట్ల భారతీయులలో ఒబామా పట్ల అనుకూల వైఖరి కనిపించింది. ఒబామా ఎన్నికల ఖర్చుల నిమిత్తం పలు భారతీయులు తమ విరాళాలు అందచేశారు. బుష్ కు ఆయిల్ కంపనీల లో పెట్టుబడులున్నవి కనుక చమురు ధర పెరిగినా పట్టించుకోవటం లేదని, వాల్ స్ట్రీట్ (US Stock exchange) లో జరుగుతున్న futures trading లోని మితిమీరిన speculation కు ఒబామా రాకతో, సంకెళ్లు పడి, చమురు ధరలు తగ్గి, ప్రస్తుతం గాలన్ గాస్ ధర రెండు డాలర్ల లోపు రావటం, ప్రజలకు ఊరట నిచ్చింది. రాబోయే మూడేళ్లలో 2.5 మిలియన్ కొత్త ఉద్యోగాల సృజనకై, ఒబామ ఆర్థికవేత్తలతో కలిపి ప్రణాళికలు రచిస్తున్నాడు.

ఇంత ఆర్థిక మాంద్యం లో కూడా అమెరికా డాలరు గట్టిపడటం పెద్ద విశేషంగా చెప్పాలి. బ్రిటన్ పౌండ్, భారతీయ రూపాయ తో పోలిస్తే, డాలర్ పటిష్టంగా ఉంది. ఇది అమెరికా కు ఆశాజనకమైన విషయం. ఇక్కడ చాలా ఉత్పత్తుల పై చైనా లో తయారయినవి అనే లేబుల్ కనిపించటం మామూలు. వినియోగ వస్తువులన్నీ అమెరికా దిగుమతి చేసుకొంటుంది. దుస్తులు, ఎలక్ట్రానిక్ పరికరాలు, కెమారాలు, ఆహార వస్తువులు ఎన్నో వాటిని అభివృద్ధి చెందుతున్న దేశాల నుంచి దిగుమతి చేసుకుంటుంది. ఈ దిగుమతులు ఉభయ దేశాలకూ లాభమే.

అమెరికాను అతలాకుతలం చేసిన Sub Prime Crisis నుంచి తెరుకోవటానికి ఇంకో సంవత్సరం పట్టవచ్చు. కొత్త అప్పులు ఇచ్చే విషయంలో చేతులు కాలాక, ప్రస్తుతం ఇక్కడి బాంకులు జాగరూకతో వ్యవహరిస్తున్నాయి. అమెరికాను సాంకేతికంగా, ఆర్థికంగా పరిపుష్టి చెయ్యటానికి ఒబామా ఎన్నో కలలు కంటున్నాడు. ఆ కలలు (The Blueprint for Change) ను ఇక్కడ నుంచి దిగుమతిచేసుకోవచ్చు. కలలు ఫలించాలని, ఇక్కడి ప్రజల సంబరం, కలకాలం నిలవాలనీ ఆశిద్దాం. ఈ ప్రపంచీకరణలో, వసుధైక కుటుంబం అనే భావన, అన్ని దేశాలు సుఖ, సంతోషాలతో ఉండటం లోనే మన భారతీయుల అభ్యున్నతి ఉంటుంది.